Atuarfiit peqataatitsiffiulit
Atuarfik peqataatitsiffiusoq
- tamanut naleqquttumik ilusilersugaavoq / kikkunnit tamanit iserfigineqarsinnaavoq
- ilinniartitsinermik atuagassanillu atuartunut tamanut naleqqussaaffiuvoq
- naammattunik piginnaasalinnik ilinniartitsoqarfiullunilu ikorfartorteqarfiuvoq
- aqutsisoqarpoq atuartut pisinnaatitaaffiinik ilisimasalinnik
- atuartut inuunerisa sinnerannut sunniuteqarluartussamik aallartitsisitsilluarfiuvoq
Atuarfiup peqataatitsiffiunissaa sooq pingaaruteqarpa?
Atuarfik ilinniarfiuinnarnani inooqataalersitsiffiuvoq imminullu paasinniffiusarluni. Peqatit peqatigalugit avatangiisini taama ittuniinneq inuunerup sinnerata ingerlarnganut aalajangiisuulluinnartarpoq. Tamatumunngami ilaavoq allat naligalugit namminerlu aalajangiisinnaalluni inuunissamut periarfissaq pingaaruteqarluinnartoq.
Meeqqat inuusuttuaqqallu innarluutillit ilarpassui akimmiffeqartarput atuarfimmi piginnaasaminnik tamakkiisumik atorluaanissaminnut akornutigisaminnik. Imaassinnaavoq atuarfik tamanut naleqquttumik ilusilersugaanngitsoq, atuarfik ilinniartitsinermik inunnut ataasiakkaanut naleqqussaaffiusinnaanngitsoq, imaluunniit immikkut ittumik atuartitsinerluffiusoq arlaatigullu meeqqat allanik ataatsimooqateqarfigisinnaanngikkaat. Meeqqat innarluutillit uumisaarneqarajunnerupput, ajattorneqarajunnerullutik atuartullu allat naligalugit atuarfimmi sammisassani peqataanissamut periarfissaqartuaannarnatik. Tamatuma kinguneranik tarnikkut peqqiilliulertarput ilinniarnerminnilu angusarissaarneq ajorlutik.
Ilinniartut innarluutillit atuarfimmi naleqquttunik naleqqussaavigineqartariaqartut tamarmik naleqqussaavigineqarnissaminnik pisinnaatitaaffeqarput. Taamaakkaluartorli ilarpassui pisinnaatitaaffigisaminnik tunineqarneq ajorput.
Taamatuttaaq ilinniartut tamarmik tunngaviusumik atuarfimmi inaarutaasumik misilitsinnissaminnut pisinnaatitaaffeqarput, amerlanertigulli misilitsinngitsoortoqartarpoq. Taamalu ilinniartoq ilisimasaminut piginnaasaminullu uppernarsaatissaaruttarpoq.
Illit politikeritut suut iliuuserisinnaavigit?
Illit partiilu attavigisat kommunalbestyrelsemiilerussi illit atuarfimmik piginnittutut akisussaassuseqarlutit ukuninnga iliuuseqarnissat naatsorsuutigaarput:
- atuartut tamarmik illoqarfimminni atuarsinnaaniassammata kommunimi atuarfiit tamarmik tikikkuminartuunissaannik qulakkeerineq
- atuarfiit atuartunik tamanik isumaginnissinnaaniassammata pædagogikkimut tunngatillugu naammattumik piginnaasaqarfiunissaannik qulakkeerineq
- meeqqat atuarfii pillugit inatsisit maleruarneqarnissaannik atuartullu pisariaqartitsisut naleqqussakkamik ilinniartinneqarnissaannik, immikkut ilinniartinneqarnissaannik aamma tarnikkut inooqatigiinnikkullu pitsaasunik avatangiiseqarnissaannik qulakkeerineq
- meeqqat atuarfianni atuartut tamarmik inaarutaasumik misilitsinnissaannik qulakkeerineq