Naligiissitaallunga namminersorlunga inuuffigisinnaasannik najugassinnga!
Inissaqartitsineq pillugu politikki peqataatitsiffiusoq
- sumiluunniit kimilluunniillu najugaqateqarluni najugaqarnissamut periarfissaqarnissamik qulakkeerutaavoq
- nammineq najugaqarsinnaanngitsunut nakkutigisaasuni najugaqarnissamut periarfissiisarpoq
- napparsimatilluni, ajoqusersimatilluni innarluuteqartilluniluunniit illumik allanngortiterinissamut ikiorserneqarnissamut periarfissiisarpoq
- angerlarsimaffinnik piginninnissamut periarfissiisarpoq
Inissaqartitsineq pillugu peqataatitsiffiusumik politikkeqarnissaq sooq pingaaruteqarpa?
Inuit innarluutillit inissaqarnermut tunngatillugu killilinnik periarfissaqarput. Taakkununnga inissaasinnaasut ikittuinnaapput, ataatsimullu isigalugu issiavinnut kaassuartakkanut naleqqussakkanik pingaarnernik initalinni najugaqartoqanngilaq. Innarluutillit ilarpassuisa allanut pulaarnissamut inooqataanissamullu periarfissaat killeqarput. Kommunit peqataatitsinissaq tunngavigalugu inissanik neqerooruteqartariaqarput inuit innarluutillit qanoq najugaqassanerlutik kikkunnillu najugaqateqassanerlutik namminneq aalajangersinnaaniassammassuk.
Kommunit ilarpassui najukkanik nammineq pigisanik naleqqussaanissamut ikiorsiinissamik neqerooruteqarneq ajorput, ikiorsiisartulluunniit pisariaqartinneqartunik matussusiisinnaaneq ajorput. Inunnut innarluuteqalersunut pingaaruteqarpoq nammineq angerlarsimaffimminniiginnarniarlutik aalajangersinnaanissaat. Taamatut aalajangertoqaraangat amerlanertigut najukkanik naleqqussaanissaq pisariaqartarpoq.
Illit politikeritut suut iliuuserisinnaavigit?
Illit partiilu attavigisat kommunalbestyrelsemiilerussi illit akisussaassuseqarlutit ukuninnga iliuuseqarnissat naatsorsuutigaarput:
- kommunimi pilersaarutit innuttaasut tikikkuminartunik / tamanut naleqqussakkanik ilusilersugaasunik inissaqarnissamik pisariaqartitaannik isumaginniffiunissaannik qulakkeerineq
- najugassanik nammineq toqqaaqataasoqarsinnaanissaanik qulakkeerineq
- inissianik nakkutigisaasunik naammattunik neqerooruteqartoqarnissaanik qulakkeerineq
- initaarniarnissamut tapiissuteqartitsinissamik naleqqussaanissamullu ikiorsiinissamik pisariaqartitsisunut neqerooruteqarneq, pisariaqartitsisoqarneralu naapertorlugu tunngavissanik amerlisaaneq
- innarluutillit inuusuttut angerlarsimaffimminnit nuullutik namminneq initaarsinnaanissaannik qulakkeerineq