Suliffeqarfiit peqataatitsiffiullutillu kinaassusersiorfiunngitsuulit sulisunik tamanik naligiissitsiffiullutik, aningaasatigut attaviitsuuffiullutik peqataaffiusinnaallutillu!

Suliffiit peqataatitsiffiusut

  • assigiinngiiaassutsimik pitsaasutut nakuussutitullu isiginniffiuput illullu/illorsuillu tamanut naleqquttumik ilusilersugaallutik suliffigisallu naleqqussagaallutik
  • nalinginnaasunik suliffissaqartitsiffiulluarput – aamma piffissaq tamaat sulisinnaanngitsunut
  • suliffittaarnissamut ikiortarialiannut inummut naleqqussakkanik suleriaasissaqartitsisarput
  • pisortanit ikiorserneqarluni ilinniaqqittoqarnissaanik periarfissaqartitsisarput
  • sulisitsisoqarput inunnik innarluutilinnik atorfinitsitsinissamut tapersersorneqarlutillu kajumissaarneqartartunik

Peqataatitsiffiusumik suliffeqarnissaq sooq pingaaruteqarpa?

Inuit suliffeqarfinni peqataanissaannut periarfissikkumagaanni inunnik innarluutilinnik assigiimmik pinnittoqartariaqarpoq. Suliffeqarfinni naligiissitsiffiusuni assigiinngiiaassuseq nalinginnaasuuvoq, sulisitsisullu suleqatillu sunik nappaateqarneq innarluuteqarnerluunniit pinnagit piginnaasat isiginiarneruaat. Suliffeqarneq aningaasatigut toqqissisimatitsisarpoq, nammineersinnaatitsisarpoq inuiaqatigiinnullu tapiissuteqarnissamut periarfissaqartitsisarluni. Suliffik aamma arlaannut ilaasutut misigititsisarpoq – tamannalu pingaaruteqarluinnarpoq. 

Kikkut tamarmik peqataasinnaanissaannut piumasaqaatit

Inuit innarluutillit ilaat suliffimminnik naleqqussaasariaqarluinnartarput. Suliffimmut isersinnaanissaq illullu/illorsuillu tamanut naleqquttumik ilusilersugaanissaat pingaaruteqarpoq, inuilli ilarpassuinuttaaq pingaartuuvoq suliassanik suliffimmilu atukkanik naleqqussaanissaq. Paasissutissiuinermi teknologii atortussiallu allat taamatut naleqqussaanissamut iluaqutaasinnaapput.

Atorfiit piffissap ilaani suliffissat naleqqussaaffigineqarsinnaasullu ikippallaarnerat inunnut innarluutilinnut, nalinginnaasunik atugaqarfiusunik atorfeqarsinnaanngitsunut, ikinngeqisunut unammillernartuuvoq. Kommunit amerlasuunut sulisitsisuupput, peqataatitsinerlu pitsanngoriangaatsiassaaq kommunit inunnik innarluutilinnik amerlanerusunik sulisoqalerpata. Kommunit kommunimi sulisut innarluuteqartortaasa ikinnerpaaffissaannik aalajangiisariaqarput.

Majoriap malittarinnittarnera ikiuisarneralu inuit innarluutillit ilaannut suliffittaarnissamut qinnuteqarnissamut piukkunnarsartunut pingaaruteqartorujussuuvoq. Ingammik piginnaanngorsaqqinnissaq sulisinnaassutsimik misiliinermik aallarniinertalik nikerartumillu suliffeqartitsinertalik suliffeqarfinni akuulernissamut pingaaruteqarluinnartuupput. Majoriami suliatigut piginnaasaqartoqartariaqarpoq inunnillu innarluutilinnik pingaartitsisoqartariaqarluni. Pisariaqartitsisunut naleqqussakkanik sivisuumik suleriaasissaqartitsisinnaasariaqarput inuit innarluutillit ataavartumik nalinginnaasumik suliffeqalersinnaaqqullugit.

Sulisitsisut suliffinnik peqataatitsiffiulernissaannut pingaaruteqarluinnarput. Sulisitsisut atorfinitsitsiniarnerannut ikorfartuutaasunik aammattaarlu sulisunik ataasiakkaanik naleqqussartarialinnik isumaginnissinnaanissamut aaqqissuussaqarlunilu piginnaasaqartoqartariaqarpoq. Akissarsiatigut tapiissuteqartitsigallartarnerit ataavartussamillu tapiissuteqartitsisarnerit sulisitsisunut inunnik sulisinnaanikillisimasunik atorfinitsitsisartunut atortussaalluarput. 

Ajornanngikkaangattaaq pingaaruteqarpoq kommunit sulisitsisunut piumasaqaateqartarnissaat.

Illit politikeritut suut iliuuserisinnaavigit?

Illit partiilu attavigisat kommunalbestyrelsemiilerussi illit politikeritut kommunimilu sulisitsisutut akisussaassuseqarlutit ukuninnga iliuuseqarnissat naatsorsuutigaarput:

  • politikkinik suliniutinillu illit kommuninni inunnik innarluutilinnik naligiissitsisoqarnerulersitsisussanik ineriartortitsisoqarnissaanik isumaginninneq, inunnillu innarluutilinnik sulisoqalernerup naligiissitsisoqarnerulernissaanik suliniuteqarnermut tamatumunnga ilaatinnissaa
  • isumaliutersuutaannaasunik politikkiliuinnarnani iliuusissanik tigussaasunik pilersaarusiorneq
  • suliffiit peqataatitsiffiusut pillugit paasinninnerusoqarnissaanik ilisimasaqarnerulertoqarnissaanillu qulakkeerineq inunnillu innarluutilinnik sulisoqalernermi assigiinngisitsisoqarneranik qulaarineq/assigiinngisitsisoqarnissaanik pinaveersaartitsineq. Eqqumaffigissavattaaq sulisut assigiinngisitsisoqarneranik misigisaqarsinnaammata akimmiffeqartarmallu sulisaaseqartoqartarlunilu assigiinngisitsiffiusunik
  • kommunimi sulilerlaat ikinnerpaamik 5%-iisa innarluutiliunissaannik qulakkeerineq, aamma piffissap ilaani suliffinnut tunngatillugu
  • suliffimmi avatangiisit inunnut innarluutilinnut piukkunnartut suliffiillu inunnut innarluutilinnut naleqqussakkat pillugit kommunip ilisimasaqarnerulernissaanik qulakkeerineq
  • kommunip sulisitsisutut naleqquttunik naleqqussaanissaanik qulakkeerineq
  • kommunip illuutaasa suliffiutigisut tamanut naleqquttumik ilusilersugaanissaannik qulakkeerineq
  • inuit innarluutillit namminersortoorusuttut naleqqussakkamik suliffeqarfiuteqalernissamut ikiorserneqarnissaannik isumaginninneq
  • nammineq illoqarfigisami suliffeqarfinni inunnik innarluutilinnik peqataatitsinermi maligassiuisuunissamik isumaginninneq
  • nutaaliornerup, suliffeqarfinni politikkit kommunimilu suliffeqarfinnut attaveqarnerup suliffeqarfinni peqataatitsinerunermut atassuteqarnerannik takunnissinnaanissaannik qulakkeerineq
  • atorfinnik akissarsiatigut tapisiaqarfiusinnaasunik, suliffimmut sulilersumullu naleqqussakkanik, amerlanerusunik pitsaanerusunillu pilersitsinissaannut sulisitsisunik aalajangersimalluni ikiuineq
  • suliffeqarfinni siunnersuisartoqarnissaanik isumaginninneq
  • kommunip Majoriaq sunniuteqarluartartoq aqqutigalugu inunnik amerlanerusunik nalinginnaasunik nikerartumilluunniit aalajangivissumik suliffittaartitsinissaannik qulakkeerineq
  • Majoriap inuit innarluutillit pillugit suliniutaanik pitsanngorsaanissamik tamatumalu saniatigut pineqartoq pillugu immikkut ilisimasalinnik sulisoqarnissaanik qulakkeerineq