ATUUTTUNNGORTINNEQARNERANUT UPPERNARSAAT

Pilersitsinermut allagartaq uppernarsaat atsiugaq PDF-itut uani aajuk

Nunatsinni Inuit Innarluutillit Kattuffiata (NIIK) siulersuisuisa,

ulloq 9. november 2018, nal. 17:15, Taseralimmi, Sisimiuniittumi

pilersitsillutik ataatsimiinnerannit imaqarniliaq

Peqataasut: ISI, Inooqat, Landsforeningen Autisme - Kalaallit Nunaanni immikkoortortaq aamma KTK

Peqataasinnaanatik nalunaartut: KNIPK

Alaatsinaattutut ataatsimeeqataasut: Inuit innarluutillit illersuisuat, Dansk-it innarluutilinnut kattuffii, Inuit pisinnaatitaaffiinut Institut-i, Sugisaq, Nuummi Gigtertut Peqatigiiffiat, aammalu illoqarfinni immikkoortortani ukunani innarluutilinnut peqatigiiffiit; Maniitsoq, Sisimiut aamma Paamiut.

Anders Meilvang tikilluaqqusivoq, nassiussuunneqarsimasorlu una saqqummiullugu:

ULLORMUT OQALUUSERISASSAT:

  1. Ullormut oqaluuserisassat akuersissutigineqarneri.
  2. Ataatsimiinnermi aqutsisussamik aamma imaqarniliortussamik toqqaaneq.
  3. Nunatsinni Innarluutillit Kattuffiannik pilersitsinissamut siunnersuut kiisalu malittarisassanik saqqummiussineq aamma akuersissuteqarneq.

 

Malittarisassanut siunnersuut qallunaatut aamma kalaallisut nassiussuunneqarnikuuvoq.

 

  1. Siulittaasumik, siulittaasup tullianik aamma naatsorsuuserisumik toqqaaneq.
  2. Taasariaqartut allat

Matuma kingorna immikkoortut ataasiakkaat oqaluuserineqarput

1-mut tunngatillugu. Ullormut oqaluuserisassatut siunnersuutigineqartoq allannguuteqartinneqarani akuersissutigineqarpoq.

2-mut tunngatillugu. Anders Meilvang ataatsimiinnermi aqutsisussatut aamma Anna Ida Jonsson imaqarniliortussatut toqqarneqarput.

3-mut tunngatillugu. Malittarisassatut siunnersuutit Anders Meilvang-imit saqqummiunneqarput, matumani pingaarnertut anguniagassatut siunniunneqarsimasunut immikkoortortat, erseqqissaatigineqarporlu, NIIK-ip sulinermini suliniutissatuarigaa, peqatigiiffiit kattuffimmut ilaasortaasa ataatsimoorlutik soqutigisaasa siuarsarneqarnissaat.

Aammattaaq erseqqissaatigineqarpoq, ataatsimeersuartoqartarnianngimmat, kisiannili siulersuisut qullersaasut, peqatigiiffiit kattuffimmut ilaasortaasut tamarmik, siulittaasuminnit imaluunniit siulersuisunut ilaasortamit allamit, siulersuisuni sinniisuutitaqarmata.

Malittarisassanut, katillugit sisamanik apeqquteqartoqarluniluunniit allannguutissatut, siunnersuuteqartoqarpoq:

  1. Atissatut siunnersuutigineqarsimasup Nunatsinni Innarluutillit Kattuffiat uunga allanngortinneqarnissaa isumaqatigiissutigineqarpoq Nunatsinni Inuit Innarluutillit Kattuffiat, matumani ersersinniarlugu inuit innarluutillit pineqarmata.
  1. Landsforeningen Autisme Karsten Høy-i § 4, imm. 2-imi piumasaqaataasumut apeqquteqarpoq peqatigiiffiit kattuffimmut ilaasortaasut naatsorsuutaat kukkunersiuisumit akuersissutilimmit imaluunniit kukkunersiuisumit nalunaarsorneqarnikumit iluarsaanneqartassanersut. Anders Meilvang erseqqissaavoq, piumasaqaat tamanna pingaaruteqartuusoq, kisianni imm. 3 malillugu tamanna immikkut ittumik pisoqartillugu taamaatitinneqarsinnaasoq.
  1. Inooqat Benny Kokholm-i erseqqissaassuteqarpoq, ukiut marlukkaarlugit ataatsimeersuartartuullutik, tamannalu peqqutigalugu § 4, imm. 2-mut, ukiumut ataasiarlutik naatsorsuutinik kukkunersiorneqarsimasunik tunniussisoqartarnissaannut, piviusunngortitsisinnaanatik. Anders Meilvang paasissutissiivoq, tassani aamma § 4, imm. 3 malillugu, piumasaqaammik tamatuminnga aamma immikkut ittumik akuersissuteqartoqarsinnaasoq.
  1. Anders Meilvang-ip siunnersuutaa, illoqarfinni peqatigiiffinnik immikkoortortanik ilaasortanngortitsisoqarsinnaassasoq, isumaqatigineqarpoq, ilaasortaqarfiit taakku, peqatigiiffinnut kattuffimmut ilaasortaasunit sinniisuutitaqartuni ilaasortaasimanngippata. Tamanna aallavigalugu § 3, imm. 2-imik nutaamik ilanngussisoqassaaq.
  1. Landsforeningen Autisme Karsten Høy-i apeqquteqarpoq peqatigiiffinnut kattuffimmut ilaasortaasunut aningaasatigut artukkiissutaasinnaasut suut pineqarnersut. Anders Meilvang ilisimatitsivoq, § 18, imm. 2 malillugu, siulersuisunit annertussusilerneqarsimasumik akiliuteqartoqartassasoq, soorluttaaq § 18, imm. 2 malillugu akiliummik annikilliliisinnaanermik imaluunniit immikkut pisariaqartitsinermik nalilersuineq aallaavigalugu akiliisitsinissaq pinngitsoortinneqarsinnaasoq. Akiliutigineqartartussap annertungaarnissaa ilimanaateqartinneqanngilaq, tassami ingerlatsinermut tapiissutissanik aningaasaateqarfinnut, Namminersorlutik Oqartussanut il.il., qinnuteqartoqartarniarmat.

Tamatuma kingorna NIIK-mik atuuttussanngortitsinissap qinersissutigineqarnissaa tikinneqarpoq

ISI-p, KTK-p pisinnaatitsineq aallaavigalugu, Inooqat-ip aamma Landsforeningen Autisme Kalaallit Nunaanni immikkoortortap – atuuttussanngortitsineq qinersinermikkut toqqarpaat.

Tamatumani kattuffimmik atuuttussanngortitsineq ersaattaannersuakkut nersorniarneqarpoq.

Tallimaattut kingullertullu nuna tamakkerlugu innarluutilinnut kattuffiusup KNIPK-p allakkatigut nalunaarutigisimavaa, isumaqarlutik NIIK-mut ilaasortanngussagunik tamanna ataatsimeersuarnikkut aalajangiunneqaqqaartariaqartoq, tullissaanillu ataatsimeersuarnissartik aatsaat ukioq 2020-imi pisussaasoq.

Anders Meilvang-ip paasissutissiissutigaa, NIIK-ip KNIPK-ip qanittumik suleqatiginissaa kissaatigisarigaa aammalu piaartumik ilanngunniarnissaat neriuutiginerarlugu. Aammattaaq NIIK-p illoqarfinni immikkoortortat, kattuffinnut allanut ilaasortaaffeqanngitsunik ilaasortanngortitsinnissaq kissaatigisarigaa, soorlu assersuutigalugu Sugisaq aamma Nuummi Gigtertut Peqatigiiffiat.

 

4-mut tunngatillugu. Peqatigiiffiit kattuffimmut ilaasortaasut sisamaasut taakku tamatuma kingorna nalunaaruteqarput, § 8 malillugu, kikkut siulersuisunut ilaasortassatut toqqarsimaneritsik. Tamatuma kingorna siulersuisut tassaalerput:

Anders Meilvang, ISI

Lisa Josefsen, KTK

Benny Kokholm, Inooqat

Pia Kielsen, Landsforeningen Autisme, Kalaallit Nunaanni immikkoortortaq

Matuma kingorna, § 9 malillugu, siulersuisut inissitsiterput Anders Meilvang siulittaasunngorluni aamma Pia Kielsen siulittaasumut tullersortinngorluni.

Siulersuisut Grønlands Revisionskontor A/S kukkunersiuisussatut toqqarpaat.

5-mut tunngatillugu. Dansk-it innarluutilinnut kattuffiini siulersuisoq Thorkild Olesen kattuffimmik suleqatigisassaminnik pilersitsisoqarluni atuuttussanngortitsisoqarnera pilluaqqussutigaa aammalu qanittumik suleqatigiinnissamik suleqatigiilluarnissamillu kissaateqarluni.

Sisimiut, ulloq 9. november 2018

Inooqat -Kalaallit Nunaanni Angajoqqaat ineriartornermigut akornutilimmik meerallit peqatigiiffiat

Siulittaasoq Benny Kokholm

 

ISI -Kalaallit Nunaanni Tappiitsut isigiarsuttullu peqatigiiffiat

Siulittaasoq: Akaaraq Samuel Olsen

KTK -Kalaallit Nunaanni Tusilartut kattuffiat

Anders Meilvang, Siulittaasoq Lisa Marie Josefsen-imit pisinnaatitsineq aallaavigalugu

Landsforeningen Autisme,Kalaallit Nunaanni immikkoortortaq

Siulittaasoq Karsten Høy

 

NIIK

Siulittaasoq Anders Meilvang

NIIK

Siulittaasup tullia Pia Kielsen