Inuit innarluutillit pisinnaatitaaffii pillugit isumaqatigiissut

Inuit innarluutillit pisinnaatitaaffiinut isumaqatigiissut NIIK-ip sulineranni qitiusupilussuupput. Isumaqatigiissutip immikkoortui, suleriaatsitsinni aammalu isummersortarnitsinni, ineriartortitsisinnaanerullu sammivigisaannut tikkuussisorujussuupput.

Uani inuit innarluutillit pisinnaatitaaffii pillugit paasissutissatut isiginnaagassiaq isiginnaarsinnaavat.

Inuit innarluutillit pisinnaatitaaffiinut isumaqatigiissutip anguniagaraa qulakkeerniassallugu inuit innarluutillit innuttaasut allat assigalugit pisinnaatitaaffeqartinneqarnissaat. Isumaqatigiissutip, pisinnaatitaaffiit paasineqarnissaat aamma isumaqatigiissutip inunnut innarluutilinnut qanoq iluaqutaalersinneqarsinnaanerat, tikkuuttussaavaa. Taamaasilluni pisinnaatitaaffiit nutaajusut pineqanngillat, kisiannili inooqataanermut tunngatillugu, politikkut, aningaasaqarnikkut, isumaginninnermilu aamma piorsarsimassutsikkut inunnut innarluutilinnut sammiveqartumik ukkassisoqartarnissamik tikkuussisuulluni.

Inuit innarluutillit inuit pisinnaatitaaffiinut isumaqatigiissutinit tamaginnit illersugaapput. Inunnulli innarluutilinnut tunngatillugu pisinnaatitaaffiit, innuttaasut allat assigalugit pisinnaatitaaffinnit, tamakkiisumik qulakkeerneqarsimasuunngillat. Taamaattumik Naalagaaffiit Peqatigiit ulloq 13. December 2006, inunnut innarluutilinnut pisinnaatitaaffinnut immikkuullarissumik sammivilimmik isumaqatigiissummik atuuttussanngortitsivoq.  Naalagaaffiit Peqatigiit inuit innarluutillit pisinnaatitaaffiinut isumaqatigiissutaa nutaaliaasutut ineriartortitatut inooqatigiinnikkut-politikkikkullu aamma aningaasaqarnikkut-inooqataanikkut-piorsarsimassutsikkullu pisinnaatitaaffinnik sammiveqarluni suliaavoq.