Inuit innarluutillit pisinnaatitaaffii pillugit isumaqatigiissut - Atuaruminarsagaq

Tilioq isumaqatigiissut atuaruminarsarlugu saqqummersitsisimavoq..

                             

Inuit innarluutillit pisinnaatitaaffii pillugit isumaqatigiissut – immikkoortortakkaartoq

Naalagaaffiit Peqatigiit inuit innarluutillit pisinnaatitaffii pillugit isumaqatigiissutaa tassaavoq isumaqatigiissutitavia, pisinnaatitaaffinnik aamma nakkutilliinissamik imalik, kisianni aammattaaq ilassutitut protokolit nammineq toqqagassartalinnik imallit isumaqatigiissummut ilaatinneqartut, inunnut ataasiakkaanut aamma inuit innarluutillit pillugit peqatigiiffiisa, naalakkersuisut, pisinnaatitaaffiit pillugit isumaqatigiissummut, unioqqutitsisorigunikkit maalaaruteqarsinnaanermut periarfissiisumik ilassutitaqarpoq. Ilassutitut protokoli Kalaallit Nunaanni atuuttussanngortinneqarnikuunngilaq.

Inuit innarluutillit pisinnaatitaaffii pillugit isumaqatigiissutitavia tassaavoq; 50-nik immikkoortortalik, immikkoortortat immikkoortoq-nik taaneqartarput. Isumaqatigiissutip immikkoortortakkaarneri malinnaaffigiuminarsarlugit uani immikkoortortanut pingasunngorlugit avinneqarput: 

Immikkoortortaq siulleq: Isumaqatigiissutip immikkoortortaata siulliata sinaakkusersorpaa, kikkut isumaqatigiissummut ilaatinneqarnersut, kiisalu tunngaviusumik aammalu malunniuteqartumik isumasiuutit aammalu isumaata imarisaanik ilisarititsineq.

Immikkoortortap tullia: 

Isumaqatigiissutip immikkoortortaata tulliata imaraa assigiinngitsutigut politik-ikkut aalajangersimasunut tunngasut aamma pisinnaatitaaffit ataasiakkaat pineqarneri – kiisalu dansk-it naalagaaffiata aammalu Naalakkersuisut, assersuutigalugu, pisinnaatitaaffiit kikkunnut tamanut qanoq isilluni piviusunngortinneqarnissaannut, suut pisussaaffigineraat.

Immikkoortortap pingajuat: 

Isumaqatigiissutip immikkoortortaata pingajuata imaraa, nunat assigiinngitsut qanoq suleqatigiittariaqarnersut, kiisalu isumaqatigiissummik qanoq atuutsitsilersitsisoqarnissaata aammalu qanoq iliornikkut eqquutsinneqarnissaata, sannaa ingerlatseriaasissaalu, qanorlu akuttoqatigiimmik pisussamik ataqatigiissakkamillu aaqqissuussisoqarnissaa.

Inuit innarluutillit pillugit isumaqatigiissummut protokoli nammineq toqqagassartalik:Inuit innarluutillit pisinnaatitaaffii pillugit isumaqatigiissummut protokoli nammineq toqqagassartalik

Protokoli nammineq toqqagassartalik Kalaallit Nunaanni atuuttussanngortinneqarnikuunngilaq.