Artikeli 12 Inatsimmi naligiissitaaneq

 

1. Naalagaaffiit peqataasut uppernarsaqqippaat, inuit innarluutillit sumiikkaluarunilluunniit inatsisitigut illersorneqarnissamut pisinnaatitaaffeqarnermik pigisaqartutut akuerisaasut.

2. Naalagaat peqataasut akueraat, inuit innarluutillit allat assigalugit pissutsini inuunermut tunngassuteqartuni tamani inatsisitigut iliuuseqarsinnaatitaasut.

3. Nunat peqataasut inuit innarluutillit inatsisinik tunngavilimmik iliuuseqarsinnaanermut periarfissaminnik atuinissaminnik pisariaqartitsippata, suliniutinik tamatumunnga ikiuinissamut periusissanik naammaginartumik aalajangiissapput.

4. Naalagaaffiit peqataasut qulakkiissavaat nunarsuarmi inuit pisinnaatitaaffii naapertorlugit inatsisitigut iliuuseqarnissamut periusissatut aalajangikkat tamarmik ilaqartinneqassasut atornerluinerup pinaveersaartitsissutiginissaanut illersuutinik sunniuteqarluarsinnaasunik. Iliuutsit taamaattut inatsisitigut iliuuseqarsinnaanerup atorneqarnera pillugu periusissatut aalajangikkat inuit ataasiakkaat pisinnaatitaaffii, piumassuseqarnerat salliutitsisinnaanerallu ataqqissavaat, soqutigisatigut isumaqatigiinnginnertaqassanatik aammalu inuit ataasiakkaat atugaannut tunngatillugu naleqqussaanermut sunniuteqarnissaannut atuuppoq piffissaq sivikinnerpaaq atorlugu akuttunngitsumik misissorneqarsinnaanerat oqartussaasunik imaluunniit inatsisinik atortitsisunik suliamut piginnaanilinnik, sumulluunniit qilersorsimanngitsunik isumaqatissarsiortuunngitsunillu. Illersuinissamut atortut naleqquttuusariaqarput iliuutsit taamaattut inuup pisinnaatitaaffiinut aamma soqutigisaanut qanoq annertutigisumik sunniuteqarsinnaanerannut.

5. Artikelimi uani aalajangersakkat sillimaffigalugit naalagaaffiit peqataasut iliuusissat naleqquttut sunniuteqarluartullu tamaasa aalajangiiffigissavaat qulakkeerumallugu, inuit innarluutillit kikkut tamaasa assigalugit illumik pigisaqarnissamut kingornussinissamulluunniit pisinnaatitaaffeqarnerat, nammineq aningaasaatiminnik aqutsisinnaanerat, aammalu allat assigalugit aningaaserivimmit atorniarsinnaanerat, akiligassarsisitsisarfinnit taarsigassarsiniarsinnaanerat imaluunniit aningaasatigut akiligassarseriaatsinik allanik atuisinnaanerat, aammalu qulakkiissallugu inuit innarluutillit illumik pigisaminnik arsaarneqarsinnaannginnerat.

-